SANTA CRUZ, Marinduque (PIA) -- Sa ilalim ng Livelihood Seeding Program-Negosyo Serbisyo sa Barangay (LSP-NSB) na programa ng Department of Trade and Industry (DTI)-Marinduque,  naigawad sa mga benepisyaryo mula sa limang bayan ng lalawigan ang mga livelihood kits at iba pang benepisyong hatid ng kanilang tanggapan.

Nauna nang napagkalooban ng nasabing programa ang 10 sari-sari store owners; isang food cart owner; at isang hog farmer mula sa bayan ng Mogpog.

Samantala, 15 may-ari ng sari-sari store at dalawang hog farmer naman ang nakatanggap sa munisipalidad ng Buenavista.

Bukod dito, 10 sari-sari store owners sa Torrijos, habang kabuuang 34 ang nakatanggap sa mga bayan ng Santa Cruz at Gasan.

Kamakailan lamang, 41 benepisyaryo naman mula sa bayan ng Boac ang nabiyayaan ng naturang livelihood kits.

Ang paggagawad ay ginanap sa limang munisipalidad sa Marinduque na pinangunahan ni Joel Valera, regional director ng DTI-Mimaropa na personal na bumisita sa probinsya.

"Ito pong mga livelihood kits na ito ay talagang makatutulong sa inyo sapagkat naglalaman ito ng mga produktong pandagdag sa inyong mga tindahan para makabangon at magpatuloy ang inyong mga negosyo," ani Valera.

Layon ng nasabing programa na maging tulay sa mas malawak na pag-abot ng tulong sa pagpapaunlad ng negosyo sa pamamagitan ng paglalapit sa mga serbisyo ng pamahalaan sa mga tao sa pagtutulungan ng LGU at mga opisyal ng DTI. (RAMJR/ENSJR/ PIA MIMAROPA)

BOAC, Marinduque (PIA) -- Isang oryentasyon hinggil sa Kalalakihan Kontra Karahasan sa Kababaihan at Kabataan o (IMPLAN K5) sa Barangay Magapua, Mogpog ang isinagawa, kamakailan.

Ito ay sa pangunguna nina Police Chief Master Sergeant Violeta  Rioflorido, Asst. PCR PNCO Pat Reinan Ilagan, katuwang ang tagapagsalita ng Gender and Development na si  Ron Ron Livelo.

Kabilang sa mga tinalakay ay ang Republic Act No. 9262, mas kilala bilang Anti-Violence Against Women and their Children Act of 2004 gayundin ang RA No. 8353 at RA No. 7610 na dinaluhan ng mga kalalakihang residente ng nasabing barangay, upang maiwasan ang karahasan laban sa kababaihan at mga bata sa lugar na nabanggit. (MPNJR/PIA Marinduque)

Tumanggap ang mga Barangay Tanod ng District 3 at District 4 ng iba't ibang kagamitang makatutulong sa pagpapanatili ng kaayusan at katahimikan sa mga barangay sa bayan ng Santa Cruz, Marinduque.

Ayon kay Mayor Antonio Uy, Jr. kabilang sa mga kagamitang ipinamahagi ay hand book, arnis stick, vest at posas.

Dagdag pa ni Uy, personal n'yang sasadyain ang ibang distrito upang iabot naman sa iba pang mga tanod ng pamayanan ang kanilang mga bagong kagamitan.